Kardinal Pengo ahadharisha uongozi Sekondari St. Joseph

 SIKU chache baada ya Baraza la Mitihani la Taifa (necta), kutangaza matokeo ya kidato cha sita na kuonekana shule ya Sekondari ya St. Joseph inayomilikiwa na Kanisa Katoliki Jimbo Kuu la Dar es Salaam, kufanya vizuri, Askofu Mkuu wa Jimbo hilo, Mwadhama Polycarp Kardinali Pengo, ameutahadharisha uongozi wa shule hiyo kuepuka vitendo vya rushwa.

Aidha Kardinali Pengo alionya kuwa endapo uongozi wa Shule ya Sekondari ya Mtakatifu Joseph itaruhusu mwanya wa rushwa kwa baadhi ya wazazi wenye fedha kuwapatia nafasi ya masomo watoto wao kwenye shule hiyo, ijiandae  kupata matokeo mabaya.

Kardinali Pengo alitoa tahadhari hiyo hivi karibuni wakati alipokuwa akizungumza na kuwapongeza wanafunzi waliofanya vizuri katika matokeo ya kidato cha sita kutoka shule ya Sekondari ya Mtakatifu Joseph, hafla iliyofanyika nyumbani kwake Kurasini, jijini Dar es Salaam.

“Inapotokea shule fulani inakuwa bora wazazi wengi hukimbilia kupeleka watoto wao, huku baadhi ya wazazi wenye fedha kutanguliza rushwa ili waweze kuwapatia watoto wao nafasi hata kama hawana sifa za kuwepo katika shule:

Hali hii ikitokea katika shule ya Mtakatifu Joseph inaweza kuleta matokeo mabaya sana na hatimaye kudidimia na kuanza kuuliza ile namba moja iko wapi?”,alisema Kardinali Pengo. 

Hata hivyo Kardinal Pengo alisema anashangazwa na nidhamu iliyoonyeshwa na wanafunzi wa shule hiyo kwa kuwa si jambo rahisi kufaulu na kuwa na nidhamu hususan katika jiji la Dar es Salaam na kusema kuwa nidhamu imewasaidia kufanya vizuri katika mitihani hiyo.

Kardinali Pengo alisema ni jambo la faraja na furaha kwa Kanisa kwa kuwa  mafanikio hayo ni  mkakati wa Kanisa Katoliki na Makanisa mengine kupandisha kiwango cha elimu nchini baada ya kiwango hicho nchini kuyumba, hali inayoleta faraja katika shule za Kanisa kwa ujumla.

“Ilikuwa ni muhimu kwa Kanisa na tulikubaliana na makanisa mengine  kufanya kitu ili kupandisha Elimu ya Tanzania na kila Askofu lazima awe na shule moja ya awali , Shule ya msingi na sekondari ya kidato cha tano na sita ingawa jitihada hizo za kanisa kupandisha elimu ilileta changamoto kwa Serikali ”,alisema Kardinali Pengo.

Akizungumzia kushuka kwa baadhi ya Shule za Kanisa hususan Seminari Kardinali Pengo alisema pamoja na shule za Kanisa kuwa 10 bora kwa miaka mingi hatuwezi kusema daima 10 bora ni za makanisa, hivyo hayo ni matokeo kama yalivyo matokeo mengine.

“Tuna sababu ya kufurahi lakini pia ni changamoto kwa walimu wa shule ya Sekondari ya Mtakatifu Joseph ili isije kuonekana hapa mmebahatisha, ingawa si lazima mbaki namba moja lakini hatutegemei mshuke…hivyo ni changamoto kubwa kwa shule yenu”,alisema Kardinali Pengo.

Licha ya kuwapongeza wanafunzi hao Kardinali Pengo alisononeshwa na ushindi huo kuwa wa wavulana na kutilia shaka ya dhana iliyowekwa na baadhi ya watu kuwa mwanaume ndiyo kila kitu, huku akitoa wito kwa wasichana wa shule hiyo kufanya mabadiliko katika mtihani ujao kwa kushika nafasi za juu kama ilivyokuwa kwa wavulana katika shule hiyo.

Akizungumzia suala la Kanisa kuwa na shule nyingi za wasichana kuliko za wavulana Kardinali huyo, alisema sababu ya kanisa kuweka shule nyingi za wasichana kwa kuwa kanisa liliona wasichana wamebaki nyuma kutokana na historia yao ya kutoka nyumbani ya kwamba wasichana hawana umuhimu katika suala la kupata elimu na wavulana ndiyo waliokuwa wanaonekana wanafaa, hivyo kanisa liliona taifa letu linaweza kuwa na wasomi wengi wavulana.

Kwa mujibu wa Kardinali huyo, alisema wasichana wenye kiwango cha juu cha elimu ni shida kupata mwanaume wa kiwango chake na hivyo kusababisha kukosa mume.

Kwa upande wake Mkuu wa shule hiyo Sista Theodora Faustine

alizungumzia changamoto inayowakabili katika shule hiyo kuwa ni pamoja na wanafunzi wa kike kuwa wachache ikilinganishwa na wavulana kwani robo tatu ya wanafunzi katika shule hiyo wasichana na kusema kuwa hali hiyo inasababishwa na kuwepo kwa shule nyingi za wasichana katika kanisa kuliko za wavulana.

Sista Faustine aliongeza kuwa matokeo hayo yamewapa faraja  wanafunzi wa shule hiyo kwa kuwa kutokana na ufaulu mzuri walioupata wanafunzi wote wanaenda vyuo vikuu.

Wanafunzi hao waliofanya vizuri kitaifa ni pamoja na Isaac Shayo ambaye ameshika nafasi ya kwanza kwa mwanafunzi bora kitafa ikiwa pamoja na mwanafunzi aliyefanya vizuri katika masomo ya Sayansi kitaifa,  Joseph Ngobya aliyeongoza katika masomo ya sanaa na Prince Mwambaja aliyeongoza katika masomo ya biashara.

Isaac Shayo alibainisha siri ya mafanikio yake kuwa ni pamoja na wazazi wake kumsaidia katika mahitaji yake ya shule ikiwemo Mwalimu mkuu wa shule hiyo kuwaongoza vema kusoma vitabu mbalimbali ambavyo vimewasaidia na kuwaletea mafanikio makubwa.

Habari kwa hisani ya radio tumaini